विराटनगर । सुनसरीको ईलाका प्रहरी कार्यालय सितागञ्जमा कार्यरत एक जना प्रहरी जवानलाई ४० हजार घुस रकमसहित पक्राउ परेका छन् । अख्तियार दुरुपयोग अनुसन्धान आयोगको कार्यालय इटहरीबाट खटिएको टोलीले शुक्रवार प्रहरी जवान कासिन्दर यादवलाई पक्राउ परेको हो ।
यादवले ईलाका प्रहरी कार्यालय सितागञ्जमा परेको उजुरी मिलाई दिने प्रयोजनका लागि सेवाग्राही सो रकम माग गरेको सूचनाको आधारमा खटिएको टोलीले उनलाई पक्राउ गरेको आयोगका प्रवक्ता नारायण प्रसाद रिजालले विज्ञप्तीमार्फत जानकारी दिए ।
उनका अनुसार यादवलाई रकम लिइसकेको अवस्थामा विराटनगर महानगरपालिका–४ स्थित नोबेल मेडिकल कजेजको गेट नजिकबाट नियन्त्रणमा लिइएको छ । उनीमाथि थप अनुसन्धान भइरहेको जनाएको छ ।
