राजविराज – एनआईसी एसिया बैंक शाखा राजविराजमा भएको पौने ३ करोड रुपैयाँको ‘स्क्याम’ प्रकरणका एक जना आरोपित पक्राउ परेका छन् ।
गत माघ २३ गते सो ‘स्क्याम’ खुलासा भएपछि गत वैशाखको दोस्रो साता बैंकर्ससहित एक दर्जन व्यक्ति विरुद्ध पक्राउ पुर्जी जारी भएको थियो । जिल्ला सरकारी वकिल कार्यालयमार्फत दायर भएको सरकारी कागजात किर्ते मुद्दामा उनीहरु विरुद्ध पक्राउ पुर्जी जारी भएको हो ।
पुर्जीको आधारमा सोमबार व्यवसायी मो.सदामलाई नियन्त्रणमा लिइएको सप्तरीका प्रहरी प्रमुख प्रहरी उपरीक्षक नरेन्द्रकुमार कार्कीले बताए । गत माघ २२ गते सो बैंकमा सरकारी कागजात किर्ते गरी बनाइएको फर्जी जग्गाधनीलाई स्वीकृत गरेको २ करोड ८० लाख रुपैयाँमध्ये २ करोड ३० लाख रुपैयाँ ऋण प्रवाह गरेको पाइएको थियो ।
श्रोतकाअनुसार बैंकका प्रबन्धक संतोशकुमार यादवले बैंकका केही कर्मचारी, व्यवसायी, लेखापढी व्यवसायी र भूमिसुधार तथा मालपोत कार्यालय राजविराजका कम्प्युटर अप्रेटरसँग मिलेर राजविराज नगरपालिका–८ का रविन्द्रकुमार यादवको नाममा रहेको प्रसवनी–९ (ग) को कित्ता नम्वर २२१ को १० कठ्ठा ५ धुर जग्गाको कीर्ते जग्गा धनी प्रमाण–पत्र बनाई राजविराज नगरपालिका–९ (तत्कालिन मलेठ गाविस वडा नं.७) की वसिरन खातुनलाई फर्जी जग्गा धनी खडा गरेका थिए ।
सोही जग्गा धनी प्रमाण–पत्रको आधारमा बैंकले रोक्का नम्वर १५१२०९८० एनएल ०००२२९० मा नक्कली जग्गा रोक्का गरेको थियो भने गत माघ ९ गते घरेलु तथा साना उद्योग कार्यालय सप्तरी राजविराजमा खातुनकै बुहारी आसमा खातुनको नाममा दर्ता भएको ‘एएस ट्रेडर्स एण्ड सप्लायर्स’लाई सो ऋण प्रवाह गरेको थियो ।
पक्राउ परेका मोबाइल व्यवसायी मो.सदाम फर्जी जग्गाधनि बसिरन खातुनका छोरा तथा ऋणी आसमाका श्रीमान् हुन् । आसमाले ऋण लिएको बेला आफ्ना श्रीमान् मो. सदामकै मोबाइल पसल मुल्याकंन गराएकी थिइन् ।
