जनकपुरधाम, २१ असार–धनुषाको मिथिला बिहारी नगरपालिका प्रमुख प्रशासकीय अधिकृत रामदरश यादवलगायत चार जनाविरुद्ध शुक्रवार भ्रष्टाचार मुद्दा दायर भएको छ ।
अख्तियार दुरुपयोग अनुसन्धान आयोगले प्रमुख प्रशासकीय अधिकृत यादव, लेखापाल सुभाषकुमार झा, जिन्सी शाखाका प्रमुख उपेन्द्र यादव र मजदुर होजियारी उद्योगका प्रोपाइटर रामसुन्दर साह तेलीविरुद्ध विशेष अदालतमा उक्त मुद्दा दायर गरेको हो ।
उनीहरूले विद्यार्थी सिकाई अभिवृद्धि कार्यक्रममा पाँच लाख ३४ हजार ७१० रुपैयाँ भ्रष्टाचार गरेको ठहर गर्दै मुद्दा दायर गरेको छ ।
आर्थिक वर्ष २०७९–०८० मा मिथिला बिहारी नगरपालिकामा–९ स्थित आधारभूत विद्यालय र रामजानकी प्राथमिक विद्यालयमा विद्यार्थी सिकाई अभिवृद्धि कार्यक्रमअन्तर्गत कुनै काम नगरी भुक्तानी लिएको भन्ने उजुरी परेपछि अख्यितारले अनुसन्धान अघि बढाएको थियो ।
अनुसन्धान हुँदा उनीहरूले आपूर्तिकर्ताको झुट्टा दरभाउ पत्र तयार गरी खरिद मूल्यांकन समितिको बैठकमार्फत मूल्यांकनसमेत नगराई सामग्री गरिद गरी पाँच लाख ३४ हजार ७१० रुपैयाँ भ्रष्टाचार गरेको देखिएको अख्तियारले जनाएको छ ।
