राजविराज, २३ असार–सप्तरीको विष्णुपुर गाउँपालिका–१ खुरहुरियामा आइतवार दिउँसै लाखौंको चोरी भएको छ ।
स्थानीय देवलाल यादवको घरमा चोरी भएको हो । दिउँसो साढे १ बजे कोही नभएको बेला घरमा पसेर माटोमुनि गाडेर राखेको दुई लाख रुपैयाँ नगद तथा करिब ८ लाख रुपैयाँ बराबरको सुन र चाँदीका गरगहना चोरी भएको स्थानीय श्रवण यादवले जानकारी दिए ।
चोरी भएको जानकारीसँगै घटनास्थलमा पुगेर अनुसन्धान अघि बढाइएको जिल्ला प्रहरी कार्यालयका प्रहरी नायव उपरीक्षक ढुण्डिराज नेउपानले जानकारी दिए । ‘म आफैं पनि घटनास्थल पुगे र स्थानीयहरुले दिएको मोटरसाइकलको नम्वरका आधारमा चोरी घटनामा संलग्न रहेको आशंकामा एक जनालाई नियन्त्रणमा पनि लिएका छौं’ उनले भने, ‘नियन्त्रणमा लिइएका मान्छे भारतीय हो, र पाहुना आएको भन्नुहुन्छ ।’
थप अनुसन्धान भइरहेको प्रहरी नायव उपरीक्षक नेउपानले बताए ।
