नयाँ दिल्ली । कोरोना संक्रमण तीव्र गतिमा बढ्दै गएपछि मंगलबार भारतका प्रधानमन्त्री नरेन्द्र मोदीले राष्ट्रका नाममा सम्बोधन गर्दै देशलाई लकडाउनबाट बचाउनुपर्नेमा जोड दिएका छन् । उनले लकडाउनलाई अन्तिम विकल्पका रुपमा मात्र प्रयोग गर्न राज्यहरूलाई आग्रह गरे । सम्बोधनका क्रममा उनले भने, ‘आजको स्थितिमा हामीले देशलाई लकडाउनबाट बचाउनु छ, म सबै राज्यलाई अनुरोध गर्दछु कि लकडाउनलाई अन्तिम विकल्पका रुपमा मात्र प्रयोग गरियोस् ।’
उनले श्रमिकहरुलाई भरोसा दिलाइराख्न र जहाँ छन्, त्यहीँ राख्ने भूमिका निर्वाह गर्न राज्य प्रशासनसमक्ष आग्रह गरे । उनले भने, ‘राज्यहरुले दिने यस्तो भरोसाले श्रमिकहरुलाई ठुलो मद्दत पुग्नेछ, उनीहरु जहाँ छन्, त्यहीँ आगामी केही दिनमा खोप पुग्नेछ र उनीहरुको रोजगारी पनि बन्द हुनेछैन ।’
