राजविराज – सप्तरीमा एक व्यक्तिले अंश मुद्दामा अदालतबाट भएको मिलापत्रका पाना नै किर्ते गरेको पाइएको छ ।
सार्वजनिक लिखत किर्ते सम्बन्धी कसूरमा प्रहरीमा जाहेरी परेपछि सो विषय बाहिरिएको हो । जाहेरी परेपछि जिल्लाको छिन्नमस्ता गाउँपालिका–२ का शिवप्रसाद मण्डललाई पक्राउ गरी सार्वजनिक लिखत किर्ते सम्बन्धी कसूरमा जिल्ला अदालतबाट म्याद लिइएको सप्तरी प्रहरीका प्रवक्ता नरेशकुमार सिंहले बताए ।
सोही ठाउँका कुशेश्वर प्रसाद मण्डलले अंश दर्ता मुद्दा दिएका थिए । सो मुद्दामा जिल्ला अदालत २०७८ भदौ ७ गतेको पत्रले भुमि सुधार तथा मालपोल कार्यालय राजविराज सप्तरीलाई मिलापत्रको जानकारी पठाइएको थियो ।
शिवप्रसादले सो अदालतको मिलापत्रको पानाहरु नै किर्ते खडा गरी मिलापत्र कागजमा उल्लेखित क्षेत्रफलभन्दा बढि क्षेत्रफल बनाई जग्गा दखिला गरेका थिए ।
सो विषयमा प्रहरीमा जाहेरी परेपछि साउन ४ गते उनलाई पक्राउ गरी थप अनुसन्धान भइरहेको प्रहरीले जनाएको छ ।
