रामशंकर भण्डारी
बलान बिहुल, २१ असार–सप्तरीको बलान विहुल गाउँपालिकामा विपन्न तथा दलित समुदायका किसानहरुलाई आर्थिक सशक्तीकरण गर्ने उद्देश्यले ‘कृषक एटीएम कार्ड’ वितरण गरिएको छ ।
राष्ट्रिय कृषक समुह संघ नेपालद्वारा केयर नेपालको सहयोग र गाउँपालिकासँगको सहकार्यमा सञ्चालित पोषण परियोजना अन्तरगत ७ सय २ घर परिवारलाई १४ हजार ५ सयका दरले कृषि सामग्रीका लागि एटीएम कार्ड वितरण गरिएको हो ।
उक्त कृषक एटीएम कार्डलाई आश्यकता परेका बेला समूहको सदस्यहरूले बैठक बसि सम्झौता भएको पसलबाट कृषि सम्बन्धि १४ हजार ५ सय बराबरको सामग्री खरिद गर्न पाउने जनाएको छ ।
त्यस्तै, एक कृषक समूहका प्रमुखलाई २५ हजारका दरले डेमो प्रदर्शन स्थलको रुपमा राखिनेछ । जसबाट उक्त समूहको सदस्यहरुले सिकेर आफ्नो खेतीयोग्य जमिनमा तरकारी लगाएर जीविकोपार्जन गर्न सहयोग पाउनेछन् ।
गाउँपालिकाको ६ वटै वडाबाट कृषक समूह छनोट गरी पठाइएको छ । जसमध्ये वडा नम्वर १, २ र ३ बाट ५–५ वटा समूह, वडा नम्वर ४ र ५ बाट २–२ वटा समूह तथा ६ बाट ८ समूह गरी जम्मा २७ वटा समूहले सहुलियत पाएको वडा नम्वर १ का वडाध्यक्ष रामकुमार यादवले बताए ।
गाउँपालिकाका अध्यक्ष खेमचन्द्र यादवले एटीएम कार्ड वितरण गर्दै उक्त कार्डले कृषकलाई धेरै सुविधामा पहुँच हुने र कृषि क्षेत्रभित्र नगदरहित कारोबारलाई सु–व्यवस्थित हुने विश्वास व्यक्त गरे ।
