राजविराज–सप्तरीको राजविराज नगरपालिका–९ मलेठबाट गाँजा बरामद भएपछि प्रहरीले घर सिल गर्दा पनि आरोपी फेला पार्न सकेको छैन् ।
फागुन १९ गते राजनारायण साहको जग्गामा रहेको ती गोदामबाट २४ क्लिन्टल गाँजा बरामद भएको थियो । प्रारम्भिक अनुसन्धानअनुसार गाँजा तस्करीमा संलग्न देखिएका रोशन उर्फ राजेशकुमार यादवको घर सिल गरिएको छ । तर, आरोपी राजेश भने परिवारसहित सम्पर्कविहीन छन् ।
राजविराज–रुपनी सडकखण्ड अन्तर्गत राजविराज नगरपालिका–९ बिहारपुरस्थित सडकसँगै पूर्वतर्फ रहेको उक्त दुई तल्ले घरमा सिल लगाएर अनुसन्धान भइरहेको सप्तरीका प्रहरी प्रमुख एसपी ढकेन्द्र खतिवडाले जानकारी दिएका छन् ।
उनका अनुसार जग्गाधनी राजनारायणसँग पनि सोधपुछ थालिएको छ भने आरोपी राजेशको खोजी कार्य भइरहेको छ । फागुन १९ गते ती गोदाममा प्रमुख जिल्ला अधिकारी भोला दाहाल नेतृत्वमा सुरक्षाकर्मीहरुको टोली पुग्दा राजेशलाई त्यहीबाट फोन समेत गरिएको थियो ।
गोदाम परिसरमा एउटा ट्रकबाट अर्को ट्रकमा सामान लोड भइरहेको देखेर शंका लागेपछि जिल्ला अधिकारी भोला नेतृत्वसहित सुरक्षाकर्मीहरुको टोली पुगेको थियो । स्याउका कार्टुन एउटा ट्रकबाट अर्को ट्रकमा लोड भइरहेको देखेपछि बिल मागिएको थियो तर बिल भने थिएन ।
शंकाकै आधारमा गोदाम चेकजाँच गर्न खोज्दा गोदाम रेखदेख व्यक्तिले आफूसँग साँचो नरहेको बताएका थिए । साँचो मगाउन त्यहीबाट राजेशलाई फोन गरिएको थियो । तर राजेशले आधा घण्टाको समय लिएर वेपत्ता नै भए ।
बाध्य भएर प्रमुख जिल्ला अधिकारी दाहालले सरोकारबालाहरुको रोहबरमा गोदामको ताला फुटाएर हेर्दा ८० वटा बोरामा प्याक गरिएको उक्त गाँजा बरामद भएको थियो । स्रोतका अनुसार राजेश त्यही बेला परिवारसहित भागेका थिए ।
गोदामका रेखदेख गर्ने भारत विहार राज्यको मधुबनी जिल्ला कुकुरदौडा ग्राम पञ्चायत वडा–१० छातापुर बस्ने ६६ वर्षीय रामनारायण यादव भने पक्राउ परेका छन् । राजेश रामनारायणका नाती ज्वाइ रहेको एसपी खतिवडाले बताएका छन् ।
श्रोतका अनुसार रोशन उर्फ राजेशकुमार यादव पनि भारतीय नागरिक हुन् । यो एंगलबाट पनि अनुसन्धान भइरहेको प्रहरी स्रोतको भनाई छ ।
