राजविराज, २८ मंसिर । सप्तरीमा नेपाल–भारत सिमा क्षेत्रबाट पेट्रोलियम पदार्थसहित पक्राउ परेकाहरुको रिहाईको माग गर्दै स्थानीयहरुले आइतवार ईलाका प्रहरी कार्यालय छिन्नमस्ता घेराउ गरी प्रदर्शन थालेको छ ।
आइतवारै छिन्नमस्ता गाउँपालिकाका सुरेन्द्र यादव, अरविन्द मण्डल र लालबाबु मण्डललाई पेट्रोलियम पदार्थसहित प्रहरीले नियन्त्रणमा लिएपछि स्थानीयहरु आन्दोलित भएका हुन् ।
दुई वटा मोटरसाईकल र एक वटा साईकलमा गरी एक सयभन्दा बढी लिटर डिजल बोकेको तीनै जनालाई प्रहरीले नियन्त्रणमा लिएको हो । तीनै जनाको रिहाई नभएसम्म प्रदर्शन जारी नै राख्ने स्थानीयहरुको कडान छ ।
यता, जिल्ला प्रहरी कार्यालय सप्तरीका डिएसपी भुवनेश्वर साहले पेट्रोलियम पदार्थको तस्करी गरिरहेको अवस्थामा पक्राउ गरिएका तीनै जनामाथि कानूनी प्रक्रिया अघि बढाइने बताए । ‘सूचनाको आधारमा खटिएको टोलीले तीनै जनालाई दशगज्जा क्षेत्रबाटै नियन्त्रणमा लिइएको हो’ उनले भने–‘नेपालबाट डिजल खरिद गरी भारततर्फ पुर्याइरहेको पाइएकोले पक्राउ परेकालाई रिहा गर्ने कुरा हुँदैन, कानून अनुसार नै हुन्छ ।’
