राजविराज–जनमत पार्टीले मधेश प्रदेशका मुख्यमन्त्रीमा सांसद सतिशकुमार सिंहलाई अघि सारेसँगै पार्टीभित्र असन्तुष्टि बढेको भन्दै चर्चा भइरहदा पार्टीका संसदीय दलका नेता महेशकुमार यादवले अरुलाई ईमान्दर ठानेर भुल गरेको प्रतिक्रिया जनाएका छन् ।
उनले बिहिवार सामाजिक सञ्जालमा स्टाटस् सो प्रतिक्रिया जनाएका हुन् । ‘ईमान्दार मान्छेले जीवनमा एउटै भुल गर्छ उसले, अरुलाई पनि आफु जस्तै ईमान्दार सम्झिन्छ !’ उनले स्टाटस् लेखेका छन् ।
केन्द्रीय सत्ता समीकरणअनुसार प्रदेश सभामा पार्टीले मुख्यमन्त्री पाउने भएपछि पार्टीले बिहिवारै मुख्यमन्त्रीमा सिंहलाई पठाउने निर्णय गरेको छ । निर्णयपछि संसदीय दलका नेता यादवलाई बाइपास गरेर एकलौटी ढंगले पार्टीका अध्यक्ष डा.सिके राउतले सिंहलाई मुख्यमन्त्री बनाउन लागिएको पार्टीका एक नेताले बताए ।
यद्यपी, पार्टीले सबै पक्ष हेरेर सिंहको नाममा सहमति जुटाएको प्रवक्ता शरदसिंह यादव बताए । मुख्यमन्त्रीमा अघि सारिएका सांसद सिंह सप्तरी क्षेत्र नं.२ (क) निर्वाचित भएका छन् भने संसदीय दलका नेता यादव सप्तरी क्षेत्र नं.(ख) बाट निर्वाचित भएका हुन् ।
