राजविराज–सप्तरीमा जारी राजविराज मेयर कप सप्तरी प्रिमियर लिगको छैठौं संस्करण अन्तर्गत लिग चरणको सबै खेलहरु सकिएसँगै प्ले–अफ समीकरण पनि पुरा भएको छ ।
पाँच खेलपछि ८ अंकसहित छिन्नमस्ता पहिलो, ७ अंकसहित तिरहुत टाइगर्स दोस्रो, समान ७ अंक भएता पनि नेट रन रेट कन्चनरुप राइनोज तेश्रो र ६ अंकसहित सनराईज तिलाठी कोइलाडी चौंथो स्थानमा रहेर प्ले–अफ प्रवेश गर्न सफल रहे ।
प्रतियोगिताको पहिलो क्वालीफायर शनिवार छिन्नमस्ता लायन्स र तिरहुट टाइगर्स बीच हुनेछ जुन खेलको विजेता फाइनल प्रवेश गर्नेछ । त्यस्तै, शनिवारै इलिमीनेटरमा कन्चनरुप राइनोज र सनराईज तिलाठी कोइलाडी प्रतिस्पर्धा गर्नेछन् । इलिमीनेटरको विजेता टिमले पहिलो क्वालीफायरमा पराजित हुने टिमसंग दोश्रो क्वालीफायरमा प्रतिस्पर्धा गर्नेछ, जुन खेलको विजेता टिम फाइनल प्रवेश गर्नेछ । दोश्रो क्वालीफायर आइतबार तथा फाइनल खेल सोमबार खेलिनेछ ।
पब्लिक विन्देश्वरी मैदानमा सम्पन्न शुक्रवारको पहिलो खेलमा तिरहुत टाइगर्सले बलान बिहुल सुपर किंग्सलाई ९० रनले पराजित गरेको छ । तिरहुटले दिएको १८५ रनको लक्ष्य पछ्याएको बलान बिहुलले १४.५ ओभरमा ९४ रनमा सबै विकेट गुमायो ।
बलान बिहुलको लागि साहब आलमले सर्वाधिक ३९ रन, पप्पु यादव र सौरभ झाले समान १४ रन योगदान दिए। तिरहुटको बलिंगमा अनिल यादव र अभिषेक कार्कीले समान ३ विकेट लिए । अनिलले ३ ओभरमा १० रन तथा अभिषेकले ३ ओभरमा मात्र ५ रन खर्चिए । रुपेश सिंहले २ तथा दिपेश कंडेल र बसिर अहमदले १/१ विकेट लिए ।
यसअघि टस जितेर ब्याटिंग गरेको तिरहुत टाइगर्सले निर्धारित १५ ओभरमा ३ विकेट गुमाएर १८४ रन बनायो । टाइगर्सको लागि बसिर अहमदले आक्रामक अर्धशतकीय पारि खेले ।
राष्ट्रिय क्रिकेटर समेत रहेका उनले ३२ बलमा ४ चौका र ७ छक्का प्रहार गरे । त्यस्तै, अमित यादवले मात्र १८ बलमा ४८ रन बनाए जुन क्रममा ४ चौका र ५ छक्का प्रहार गरे । रुपेश सिंहले १५ बलमा ५ चौका र १ छक्का मद्दतले अविजित ३० रन तथा शंकर रानाले १७ बलमा ३ चौका मद्दतले १८ रन बनाए ।
बलिंगतर्फ बलान बिहुलका बब्बु गोठीयाले २ तथा शाहब आलमले १ विकेट लिए । शुक्रवारको दोश्रो खेलमा राजविराज राजदेवि एघारले सनराईज तिलाठी कोइलाडीलाई ७ विकेटले पराजित गर्यो । प्ले–अफ चरण पुग्न जित्ने पर्ने खेलमा राजबिराज राजदेवी एघारले दिएको १९० रनको लक्ष्य तिलाठी कोइलाडीले १६.२ ओभरमा ३ विकेट गुमाएर पुरा गर्यो ।
तिलाठी कोइलाडीको लागि बिनोद भण्डारीले सर्वाधिक ६९ रन योगदान दिए। प्लेयर अफ द म्याच समेत घोषित भण्डारीले ४४ बलमा ४ चौका र ६ छक्का प्रहार गरे । यस्तै रोबिन सिंहले ३४, बिशाल सुश्लिंगले २९, नारायण जोशीले अविजित २३ तथा तृत राज दासले १९ रन योगदान दिए। राजविराज राजदेवीको बलिंगमा श्रवन यादव र राजनीत कुमारले १/१ विकेट लिए ।
यस अघि टस जितेर ब्याटिंग गरेको राजविराज राजदेवी एघारले २० ओभरमा ६ विकेट गुमाएर १८९ रन बनायो ।
राजविराजको लागि हिमांशु दत्ता र श्रवन यादवले अर्धशतकीय योगदान दिए । हिमांशुले ४६ बलमा ३ चौका र ५ छक्का तथा श्रवनले ३१ बलमा ३ चौका र ४ छक्का प्रहार गरे। दिलिप नाथले ३२ तथा मुकेश यादवले १५ रन बनाए । बलिंगतर्फ सनराईज तिलाठी कोइलाडीका बिशाल सुश्लिंगले सर्वाधिक ३ विकेट लिए जुन क्रममा ४ ओभरमा २४ रन खर्चिए । नारायण जोशीले २ तथा धिरिज कुमार मण्डलले १ विकेट लिए ।
