जनकपुरधाम, ३१ असार–महोत्तरीको सोनमा गाउँपालिका–५ खैरवनीबाट आइतवार राति चोरी डाँकालगायतका अपराधमा संलग्न रहेका एक आरोपीलाई प्रहरीले गोली प्रहार गरेर नियन्त्रणमा लिएको छ ।
पक्राउ पर्नेमा सर्लाहीको लालबन्दी नगरपालिका–२ का ४० वर्षीय बीजेन्द्र पासवन रहेका छन् । पटक-पटक चोरी डाँका गरेर फरार रहेका पासवानलाई खोजतलासको क्रममा राति साढे १० बजेतिर नियन्त्रणमा लिएको जिल्ला प्रहरी कार्यालय महोत्तरीका प्रवक्ता डीएसपी संतुलालप्रसाद जयसवारले बताए ।
उनका अनुसार पासवानलाई पक्राउ गर्न खोज्दा भाग्न थालेपछि घुँडामुनि गोली हानेर नियन्त्रणमा लिइएको छ । गोली लागेर घाइते भएका पासवानको प्रादेशिक अस्पताल जलेश्वरमा उपचार भइरहेको छ ।
पासवान लामो समयदेखि बारा, सर्लाही, महोत्तरी, सिराहा र सिन्धुलीलगायत सीमा पारी भारतमा पनि पटक–पटक डाँकामा संलग्न भएको प्रहरीले जनाएको छ ।
