झापा, ०९ पौष । झापाको मेचीनगर नगरपालिका वडा नम्वर ९ का ४७ बर्षीय बुधलाल किसान र २८ बर्षीय भयङ्कर भनिने भुखन किसान, ब्यक्ति हत्याको आरोपमा पक्राउ परेका छन् ।
पौष ०३ गते आफ्नै घर अगाडि मृत फेला परेका स्थानीय ४२ बर्षीय पुलिस भनिने पर्शुराम गौतमको हत्या भएको आशंकामा अनुसन्धान गरिरहेको जिल्ला प्रहरी कार्यालय झापाको प्रहरी टोलीले गौतमको हत्याको आरोपमा दुई जनालाई पक्राउ गरेको हो । मृत फेला परेका गौतमको शरिरमा विभिन्न निल डाम तथा चोटपटक रहेको देखि गम्भिर रुपमा अनुसन्धान थालेको प्रहरी टोलीले घटनामा संग्लग्न रहेका उनीहरुलाई पक्राउ गर्न सफल भएको छ ।
पक्राउ परेका दुबै जनाले घटनामा आफ्नो संग्लग्नता रहेको साबिती बयान दिएसँगै निजहरुको सम्बन्धमा थप अनुसन्धान भईरहेको जिल्ला प्रहरी कार्यालय झापाले जनाएको छ । उनीहरुले घटनामा प्रयोग गरेको फलामको रिम र घटना भएको समयमा लगाएका कपडा समेत बरामद गरेको उक्त कार्यालयले जनाएको छ ।
