राजविराज, ६ चैत । सप्तरीको अग्निसाइर कृष्णसवरण गाउँपालिका–५ स्थित पशु फार्ममा आज विहान आगलागी हुँदा २० वटा चौपाया जलेर मरेको छ भने आगो निभाउने क्रममा क्रममा एक जना घाइते भएका छन् ।
विहान करिब १ बजेतिर वडा नम्वर ६ का मनोज साह र दिनानाथ साहले सञ्चालन गरेको कृष्णा राम पशु फार्ममा विद्युत सर्ट भएर आगलागी भएको हो । आगलागीमा परेर १० वटा गाई र २ वटा बाछी गरी २० वटा चौपाया मरेको जिल्ला प्रहरी कार्यालय सप्तरीका प्रहरी नायव उपरीक्षक माधव प्रसाद काफ्ले जानकारी दिए ।
उनका अनुसार आगो निभाउने क्रममा घाइते भएका दिनानाथ साहको उपचारको लागि भर्ना गरिएको छ । आगलागीमा चौपाया, फार्म र अन्नपात जलेर साढे ३१ लाख रुपैयाँ बराबरको क्षति प्रहरी नायव उपरीक्षक काफ्ले बताए । आगो स्थानीयवासिन्दा र प्रहरीको सहयोगमा नियन्त्रणमा आएको जनाएको छ ।
यसअघि गत बुधवार राति पनि तिलाठी कोइलाडी गाउँपालिका–५ मा आगलागी भएर चार वटा घर पूर्ण रुपमा जलेर लाखौंको क्षति भएको छ भने आगोमा परेर एक जना घाइते भएका थिए ।
