सप्तरी । कोठा अभावका कारण सेवा प्रवाह गर्न कठिनाई खेप्दै आएको तिलाठी कोइलाडी गाउँपालिका वडा नम्वर ८ तोपाको आफ्नै कार्यालय भवन बन्ने भएको छ ।
बुधवार वडा कार्यालय भवन निर्माणको जिल्ला समन्वय समितिका प्रमुख प्रभाकर यादव र गाउँपालिकाका अध्यक्ष सतिश कुमार सिंहले संयुक्त रुपमा शिलान्यास गरेका छन् । तीन वटा कोठा तथा माथिल्लो तल्लामा हलसहित दुई तले भवन निर्माण गरिने वडा अध्यक्ष लक्ष्मी प्रसाद मण्डलले जानकारी दिए ।
चालु आर्थिक वर्षभित्रै कूल ८० लाख लागतमा निर्माण हुन लागेको भवनमा ७० प्रतिशत जिल्ला समन्वय समिति र ३० प्रतिशत गाउँपालिकाले ब्यहोर्ने गाउँपालिकाका अध्यक्ष सिंहले जानकारी दिए । सो भवनबाट सेवा प्रवाह सुलभ र सहज ढंगबाट हुने अध्यक्ष सिंहले विश्वास व्यक्त गरे ।
भवनको लागि स्थानीय ईन्जिनियर शैलेन्द्र झाले पाँच धुर जग्गा दान दिरेका छन् भने बाँकी जग्गा गाउँपालिकाले व्यवस्थापन गरेको जनाएको छ ।
