जनकपुरधाम – तीर्थयात्री बोकेको बस बाराको जीतपुरसिमरा चुरियामाईमा दुर्घटना हुँदा सात जनाको मृत्यु भएको छ भने १९ जना घाइते भएका छन् ।
मधेस प्रदेश–०३–००१ ख ७९९४ नम्बरको बस बुधबार राति दुर्घटना भएको हो । दुर्घटनामा महोत्तरी जिल्ला लोहारपट्टीका विजय पण्डित र अन्य ६ जना भारतीय नागरिकको मृत्यु भएको जिल्ला प्रहरी कार्यालय बाराले जनाएको छ ।
प्रहरीका अनुसार मृत्यु हुने भारतीय नागरिकहरुमा राजस्थानका श्रीकान्त चतुर्वेदी, बहादुर सिंह, सत्यवती, मीरा देवी, राजेन्द्र चतुर्वेदी र वैजनती देवी छन् । उनीहरू ६० वर्षदेखि ७० बर्ष उमेरका रहेका पनि प्रहरीले जानकारी लिएको छ ।
दुर्घटनापछि फरार रहेका बसका चालक र सहचालकलाई प्रहरीले जनकपुरबाट घाइते अवस्थामा नियन्त्रणमा लिएको छ ।
काठमाडौंबाट महोत्तरीको लोहारपट्टी जाँदै गरेको उक्त बस चुरियामाई मन्दिरबाट १०० मिटर खोलामा खसेको प्रहरीले जनाएको छ ।
दुर्घटनामा परी घाइते भएका १९ जनाको हेटौंडा अस्पतालमा उपचार भइरहेको छ ।
