जनकपुरधाम– मधेश प्रदेशका प्रमुख जिल्ला अधिकारी (सिडिओ)हरुले देशमा धार्मिक, सांस्कृतिक तथा सामाजिक एकता रसद्भावनामा खलल पुर्याउन केही तत्वहरु सक्रिय देखिएको विषय उपप्रधानमन्त्री एवम् गृहमन्त्री नारायणकाजी श्रेष्ठसमक्ष जानकारी गराएका छन् ।
बुधबार बर्दिबासमा आयोजना गरिएको समसामायिक सुरक्षा सम्बन्धि प्रदेश स्तरीय अन्तरक्रियामा सो विषयबारे ‘ब्रिफिङ’ गरिएको हो ।
मधेश प्रदेशका ८ वटै जिल्लाका सिडिओ र सुरक्षा निकायका प्रमुखहरुको सहभागिता रहेको सो अन्तरक्रियामा धार्मिक, सांस्कृतिक तथा सामाजिक एकता र सद्भाव बिग्रने जोखिम मधेशमै बढी देखिएको ‘ब्रिफिङ’मा पाइएको स्रोतले बताए ।
त्यस्तै, मिटरब्याज नियन्त्रण कानुन र आयोग बने पनि त्यसलाई निरुपण गर्ने सन्दर्भमा कतिपय गलत नियत भएका व्यक्तिबाट वाधा-व्यवधान खडा गर्दै आइरहेको, कतिपय पालिकाका जनप्रतिनिधिहरूको बेमेलले समेत सुरक्षा चुनौती खडा हुदै आएको, सामाजिक संजालको कतिपय समाग्रीले उत्तेजना निर्माण गर्दै आएको विषयमा ‘ब्रिफिङ’ समेटिएको छ ।
त्यस्तै, भारतमा चुनाव नजिकिएकाले सीमा क्षेत्रमा तनाव बढ्न सक्ने तथा अवैध ओसारपसार र भारतीय गाडीको अत्यधिक प्रयोगले समेत सुरक्षा व्यवधान खडा गर्न सक्ने समेत गृहमन्त्री श्रेष्ठलाई जानकारी गराइएको जनाएको छ ।
‘ब्रिफिङ’ सुनेपछि उपप्रधानमन्त्री श्रेष्ठले आवश्यक सुझाव र निर्देशन समेत दिएका छन् ।
अन्तरक्रियामा गृह मन्त्रालयका सचिव, प्रवक्ता, नेपाल प्रहरी र सशस्त्र प्रहरीका आईजी, राष्ट्रिय अनुसन्धान विभागका प्रमुख, नेपाली सेना मधेश प्रदेश प्रमुख लगायतका सुरक्षा प्रमुखहरुको सहभागिता थियो ।
