बोदे बरसाईन, १ माघ–जनप्रतिनिधि सवार सप्तरीको राजविराज नगरपालिकाको स्कर्पियोको ठक्करबाट दुई जना गम्भीर घाइते भएका छन् ।
मंगलबार विहान हुलाकी राजमार्ग अन्तर्गत बोदे बरसाईन नगरपालिका–५ स्थित स १ झ ४८१ नम्बरको स्कर्पियोले को ३० प २७३७ नम्वरको मोटरसाइकललाई ठक्कर दिएको थियो ।
पश्चिमतर्फ गइरहेको स्कर्पियोको ठक्करबाट मोटरसाइकलमा सवार बोदे बरसाईन नगरपालिका–१ घनगढी बस्ने मोटरसाईकल चालक १५ वर्षीय राजेश कुमार यादव र सोही ठाउँ बस्ने २१ वर्षीय अजित कुमार यादव गम्भीर घाइते भएको प्रहरी उपरीक्षक ढकेन्द्र खतिवडाले जानकारी दिए ।
उनका अनुसार ठक्करबाट गम्भिर घाइते भएका चालक राजेशलाई थप उपचारको लागि विपी कोइराला स्वास्थ्य विज्ञान प्रतिष्ठान धरान पठाइएको छ ।
स्कर्पियो नियन्त्रणमा लिइएको छ भने दुर्घटनाबारे थप अनुसन्धान भइरहेको जनाएको छ । उता, ठक्करपछि चालक विनोद साहले स्कर्पियोसहित भागेका थिए । उक्त स्करर्पिओ प्रहरी चन्हीले नियन्त्रणमा लिएको प्रत्यक्षदर्शीले बताए ।
प्रत्यक्षदर्शीका अनुसार उक्त स्करर्पियोमा राजविराज नगरपालिकाका एक जना जनप्रतिनिधि र अन्य ४–५ जना पनि सवार थिए । बिदाका दिन उक्त स्करर्पियो कुन प्रयोजनका लागि कहाँ गइरहेको भन्ने विषयमा बुझ्न राजविराज नगरपालिकाका कार्यवाहक मेयर इसरत प्रविणसँग सम्पर्क गर्दा फोन उठेन ।
