काठमाडौं । सत्तारुढ दल नेकपाभित्रको आन्तरिक झगडा उत्कर्षमा पुगेको छ । भोली बस्ने स्थायी कमिटी बैठकमा वारपार गर्ने रणनीतिमा दुवै पक्ष लागेका छन् । स्थायी समिति बैठकमै अध्यक्ष पुष्पकमल दाहाल ‘प्रचण्ड’सहितका नेताहरुले पार्टी अध्यक्ष तथा प्रधानमन्त्री केपी शर्मा ओलीको राजीनामा माग्ने फायर खोलेपछि उत्कर्षतर्फ अघि बढेको नेकपाभित्रको राजनीति एकले अर्कोलाई नगलाए र नथकाएसम्म पछि नहट्ने स्थितिमा पुगेको छ ।
ओली पक्ष कुनै हालतमा राजीनामा नदिने र प्रचण्ड–नेपाल समूह ओलीको राजीनामा नआएसम्म अघि बढ्नै नदिने अडानमा छन् । त्यसका लागि दुवै पक्षले आ–आफ्नो शक्ति प्रदर्शन गर्ने तयारीमा जुटेका छन् । बुधबार दिउँसो दिनभर केपी शर्माओली पक्ष र पुष्पकमल दाहाल तथा माधवकुमार नेपाल समूहका नेताहरु छुट्टाछुट्टै बैठक बसे । ती बैठक ललितपुरको झम्सीखेलदेखि, बालुवाटार, सिंहदरवार र नयाँ बानेश्वरसम्म भए । तर ती बैठकमा आ–आफ्नो अडान नछोड्ने अडानमा दुवै पक्ष दृढ देखिए । बैठकमा दुवै पक्षले बिहीबार बस्ने स्थायी समितिमा प्रस्तुत हुने रणनीतिबारे छलफल गरे ।
