राजविराज, २० साउन । मधेशी समुदायलाई होच्याएको ठहर गर्दै कान्तिपुर टेलिभिजनबाट प्रशारण हुँदैआएको ‘ह्वाट द फ्लप’ कार्यक्रमका प्रस्तोतासहितको टिमलाई निलम्बन गरिएको छ ।
गत असार ११ गते प्रशारण भएको उक्त कार्यक्रममा सन्दिप क्षेत्रीले मधेशी महिलाको काल्पनिक भूमिकामा नागरिकता सम्वन्धी विषयमा व्यंग्य गरेका थिए । सोही विषयलाई लिएर सप्तरी निवासी हाल काठमाण्डौमा कार्यरत डा. शरदसिंह यादवले प्रेस काउन्सिल नेपाल र मधेशी आयोगमा कार्यक्रमका प्रस्तोतासहिता त्यसमा संलग्नहरुलाई कार्वाहीको माग गदै उजुरी दिएका थिए । उक्त उजुरीमाथि तत्काल सुनुवाई गर्दै प्रेस काउन्सिलले कान्तिपुर टेलिभिजनलाई स्पष्टिकरणसहितको पत्र पठाएको थियो ।
कार्यक्रममा प्रसारण भएको विषय तथा प्रस्तुतिलाई लिएर ‘ह्वाट द फ्लप’ टिमले माफी समेत मागेको छ । अब उप्रान्त भविष्यमा आफ्नो कार्यक्रममा नेपालको संविधान र सञ्चारमाध्यमसम्बन्धि नीति २०६८ मा उल्लेख भए अनुसार कुनै पनि जात,जाति, धर्म, भाषा, रंग, समुदाय इत्यादिमा होच्याउने र टिकाटिप्पणी सम्बन्धी कुनै पनि दृश्य नराख्न सचेत गराइएको छ ।
