राजविराज, ५ चैत । सप्तरीको तिलाठी कोइलाडी गाउँपालिका–५ गए राति आगलागी भएको छ । आगलागीमा चार वटा घर जलेर खरानी बनेको छ भने आगोमा परेर एक गम्भीर घाइते भएका छन् ।
स्थानीय हरिकिशुन खंंगको घरमा रहेको सिलिण्डर लिंक भएर आगलागी भएको हो । राति करिब नौं बजेतिर भएको आगलागीमा हरिकिशुनसहित रामचन्द्र खंग र नकछेदी खंगको चार घर जलेको वडा अध्यक्ष राजेन्द्र साहले जानकारी दिए ।
उनका अनुसार आगोमा परेर हरिकिशुन गम्भीर घाइते भएका छन् । हरिकिशुनको उपचारको लागि पठाइएको वडा अध्यक्ष साहले बताए । रातिको समयमा आगलागी हुँदा घरभित्र रहेको अन्नपात, लत्ताकपडा, गरगहनासहितका सवै सरसमान जलेको जनाएको छ ।
प्रारम्भिक अनुमानअनुसार आगलागीमा झण्डै ७० लाख बराबरको क्षति भएको वडा अध्यक्ष साहको भनाई छ । आगो राजविराज र हनुमाननगर नगरपालिकाबाट पुगेको वारुणयन्त्र, नेपाल र सशस्त्र प्रहरी तथा स्थानियवासिन्दाको सहयोगमा आगो नियन्त्रणमा आएको जनाएको छ ।
