इटहरी । बढ्दो कोभिड–१९ संक्रमणको रोकथाम तथा नियन्त्रणमा तत्पर देखिएका जनप्रतिनिधि र कर्मचारीहरुले आ–आफ्ना सेवा सुविधालाई पनि कटौती गर्दै सर्वसाधारणको जीवन बचाउने कार्यमा जुटेका छन् । त्यसको पछिल्लो उदाहरण बनेको हो सुनसरीको बराहक्षेत्र नगरपालिकाका जनप्रतिनिधि र कर्मचारी ।
उनीहरुले प्रयोग गर्दै आएका गाडीलाई एम्बुलेन्सको रुपमा प्रयोग गर्ने निर्णय नै नगरेपछि चौतर्फी प्रशंसा बटुलिरहेका छन् । नगरपालिकाका मेयर निलम खनालले र प्रमुख प्रशाकीय अधिकृत राजेश पोखरेलले प्रयोग गर्दै आएका गाडीलाई एम्बुलेन्सको रुपमा प्रयोग गर्ने निर्णय गरेका हुन् ।
‘महामारीमा परेर सर्वसाधारण विरामी पर्नसक्ने सम्भावनालाई मध्यनजर गर्दै गाडीलाई एम्बुलेन्सको रुपमा प्रयोग गर्ने निर्णय गरेका छौं’ मेयर खनालले भने–‘विरामी पर्नसक्नेलाई समयमै अस्पतालसम्म पर्याउन सकिने हिसाबले हामीले सो निर्णय गरेका हौं ।’
मेयर खनालले चढ्दै आएको बा.१ झ ८८९१ नम्वर र प्रमुख प्रशासकिय अधिकृत पोखरेलले चढ्दै आएको बा १ झ ५८१४ नम्बरको गाडीलाई एम्बुलेन्सको रुपमा प्रयोग गर्न दिने निर्णय गरिएको छ । कोरोना संक्रमणको समयमा गरीब जनताले दुःख पाउनु नपरोस, समयमै अस्पताल लान नसक्दा ज्यान गुमाउन नपरोस् भन्ने उदेश्यले जनताको सेवामा आफु सधै तत्पर रहेको प्रमुख खनालको भनाई छ ।
‘आफुले आफ्नो काममा र नगरपालिकाको काममा हिड्नको लागि आफ्नो व्यक्तिगत स्कुटी प्रयोग गर्नेछु,’ उनले भने । एउटा गाडी गर्भवती सुत्केरीकोलागि अस्पताल ओहरदोहर गर्न र अर्को गाडी आइसोलेसनमा प्रयोग गरिने निर्णय छ । गाडीमा अक्सिजनको सिलिन्डरको व्यवस्थापन समेत गर्ने तयारी भैरहेको नगरपालिका कार्यालयले जनाएको छ ।
बराहक्षेत्र नगरपालिकास्थित सप्तकोशी बहुमुखी क्याम्पसमा ५० शैय्याको आइसोलेसन तयार गरिएको छ ।
