जनकपुरधाम, २९ वैशाख । वैकल्पिक सरकार गठन गर्न निर्णायक रहेको जनता समाजवादी पार्टी नेपाल (जसपा)का संघीय परिषद् अध्यक्ष डा. बाबुराम भट्टराईले देशको संकट हल गर्न चार बुँदे शर्तसहितका प्रस्ताव अघि सारेका छन् ।
बुधवार उनले ट्वीट गर्दै सबै दलको सहभागीतामा वर्तमान र पूर्व प्रधानमन्त्री बाहेकका नेतृत्वमा राष्ट्रिय सरकार गठन हुनुपर्ने बताएका हुन् । उनले संविधानको धारा ७६ (२) बमोजिम सरकार गठन हुनुपर्ने बताए ।
यसैगरी, दलका प्रमुख र पूर्व प्रधानमन्त्री रहेको निर्देशन समिति गठन गर्नुपर्ने, कोभिड नियन्त्रण, द्वन्द्वकालीन मुद्दा, संविधान संशोधन, आर्थिक राहतलगायत लागू गर्नुपर्ने र एक वर्षभित्र चुनाव गर्नुपर्ने प्रस्ताव अघि सारेका हुन् ।
वैकल्पिक सरकार गठनको तयारीसँगै संसद्को निर्णायक खेलाडी जसपामा दुई धार देखिएको छ । उपेन्द्र यादव गठबन्धनमा सामेल भएर नयाँ सरकार बनाउने अभियानमा लागेका छन् भने महन्थ ठाकुर र राजेन्द्र महतो यसमा सहमत छैनन् ।
प्रधानमन्त्री केपी ओलीले विश्वासको मत नपाएपछि वैकल्पिक सरकार बनाउने उपेन्द्रको निर्णयलाई लाइन विपरीत रहेको भन्दै महन्थले अलग्गै विज्ञप्ति निकालेका थिए । सोमबार संसदमा प्रधानमन्त्रीले विश्वासको मत दिने क्रममा जसपा विभाजित भएको थियो ।
उपेन्द्र पक्षका १५ जनाले विपक्षमा मत हाले भने ठाकुर पक्षका १५ जना तटस्थ बसे र दुईजना अनुपस्थित रहे । त्रिशंकु संसद्को अंकगणितमा ३४ सिट भएको जसपा निर्णायक खेलाडीको भूमिकामा छ । उसले जसलाई समर्थन गर्यो उसकै सरकार बन्ने अवस्था छ ।
