खडक नगरपालिकाः कता हरायो झण्डै २० लाखको स्यानिटरी प्याड ?

राजविराज, १० कार्तिक । सप्तरीको खडक नगरपालिकामा झण्डै २० लाख रुपैयाँमा खरिद गरिएको स्यानिटरी प्याड लाभग्राही विद्यार्थी (छात्रा)ले नपाएको आशंका गरिएको छ । महालेखा परीक्षकको कार्यालयले सार्वजनिक गरेको ०७६/०७७ को लेखा परीक्षण प्रतिवेदनअनुसार स्यानिटरी प्याड लाभग्राही विद्यार्थीले नपाएको आशंका गर्दै खरिद गर्नकै लागि सो प्याड गरिएको ठहर समेत गरेको छ ।

नगरपालिकाले सो आर्थिक वर्षमा सिलबन्दी दरभाउपत्रको माध्यमबाट सालधारी इन्टरप्राइजेज प्रा.लिबाट १९ लाख ५५ हजार ४८७ रुपैयाँ खर्च गरेर १९ हजार २२८ प्याकेट स्यानिटरी प्याड गरेको छ । खरिद गरिएका सो प्याड नगरपालिकाको स्वास्थ्य शाखाले बुझेको पनि देखाइएको छ । तर, लाभग्राही विद्यार्थीले प्राप्त गरेको विवरण (भरपाइ) भने नगरपालिकासँग छैन् ।

स्वास्थ्य शाखाबाट सो प्याड कहाँ निकासा भयो, माग फाराम तथा प्राप्त गर्ने व्यक्ति समेत एकिन नभएको प्रतिवेदनमा उल्लेख गरिएको छ । ‘कार्य विधि र योजना बेगर नै खरिद सो प्याड हालसम्म वितरण नगरेकोले खरिद गर्नकै लागि मात्र खरिद गरेको देखिन्छ’, प्रतिवेदनमा छ ।

लामो अवधिसम्म स्टोरमै राख्दा गुणस्तरमा ह्रास आउने तथा प्रयोग गर्ने मिति समेत समाप्त हुने सम्भावना भएकोले कार्यक्रमको आशय अनुरुप कार्यक्रम गत आर्थिक वर्षमै सम्पन्न हुनुपर्नेमा सो नगरिएको प्रतिवेदनमा देखाएको छ ।

प्रतिवेदनमा सम्बन्धितलाई जिम्मेवार बनाई आवश्यक कारबाही हुनुपर्ने उल्लेख समेत गरेको छ ।

सो विषयमा नगरपालिकाका प्रमुख प्रशासकीय अधिकृत कुन्दन कुमार कर्णलाई टेलिफोनमा सम्पर्क गर्दा व्यस्त रहेको भन्दै केही क्षणमा कुरा गर्ने प्रतिक्रिया दिए । केही बेरमा पुनः सम्पर्क गर्न खोज्दा उनको मोवाइल भने स्वीच अफ गरिएको छ ।

Author:

क्याटोगरी छान्‍नुहोस