सर्लाही–सर्लाहीको बागमती नगरपालिका–१ रायमाझी चोकमा विहीवार विहान यात्रुवाहक बस र भारतीय मालवाहक ट्रक ठोक्किँदा ३ जनाको मृत्यु भएको छ ।
पूर्व पश्चिम राजमार्ग अन्तर्गत भैरहवाबाट जनकपुरका लागि छुटेको लु १ ख ८८४८ नम्बरको बस र सोही स्थानमा सडक किनारमा रोकिराखेको एन एल ०११ ए एस ९२५२ नम्बरको भारतीय मालवाहक ट्रक ठोक्किएर दुर्घटना भएको हो ।
दुर्घटनामा अन्य ७ जना घाइते भएको प्रहरीको प्रारम्भिक विवरण रहेको छ । घाइतेलाई प्रहरीले उद्धार गरी विभिन्न अस्पताल पुर्याएको सर्लाहीका सशस्त्र प्रहरी उपरीक्षक विनोदराज खनालले बताए ।
दुर्घटनामा रुपन्देहीका दर्शक कुँवर, रामकरण केबट र हरिबहादुर चौधरीको मृत्यु भएको छ । तीनै जनाको घटनास्थलमा नै मृत्यु भएको हो ।
सर्लाही प्रहरीका सूचना अधिकारी प्रहरी नायव उपरीक्षक दीपक श्रेष्ठले दुर्घटनाबारे थप अनुसन्धान भइरहेको बताए ।
