राजविराज–सप्तकोशी नदीमा पानीको वहाव घटेसँगै कोशी ब्यारेजको पुलमा आइतबार साँझ साढे ५ बजेबाट आवागमन खुला गरिएको छ ।
नदीमा पानीको वहाव अत्यधिक भएर पुलमाथिबाटै बाढी बग्न थालेपछि शनिबार दिउँसो ४ बजेबाट पुलमा आवागमनमा रोक लगाइएको थियो ।
पानीको बहाव घटेको र पुलमा रहेको फोहोर सफा गरिएपछि यातायात र पैदलयात्रीलाई आउजाउ गर्न दिने निर्णय गरिएको सप्तरीका प्रमुख जिल्ला अधिकारी मेखबहादुर मग्रातीले जानकारी दिए ।
आइतबार बिहानबाट पानीको बहाव निरन्तर कम हुँदै गए पनि पुलमा बाढीले थुपारेको फोहोर सफा गर्न ६ घण्टा लागेको थियो । सुरक्षाकर्मी, स्थानीय बासिन्दा र डोजर प्रयोग गरी ब्यारेज पुलको फोहोर हटाएर कोशीमै फालिएको जनाएको छ ।
आइतबार बेलुका ५ बजे गरिएको मापनअनुसार कोशी नदीमा पानीको वहाव ३ लाख ५७ हजार क्युसेक प्रतिसेकेन्ड रहेको छ ।
