राजविराज–सप्तरी उद्योग वाणिज्य संघका अध्यक्ष लालुप्रसाद अग्रवालले आफ्नो जिम्मेवारी पूरा नगरी बजार अनुगमनको नाममा व्यवसायीलाई आतंकीत पार्ने प्रहरी प्रशासनको कार्य सरासर गलत रहेका बताएका छन् ।
बोर्डरमा मालसमान ओहरदोहर भइरहदा चुप लागेर बस्ने अनि बजारमा छापामारी गर्ने ? भनि प्रश्न गर्दै उनले भने, ‘यो व्यवसायीलाई दुःख दिने नियत मात्रै हो ।’
उनले बजारबाट अवैध मालसमान बरामद हुनुले पनि प्रहरी प्रशासनकै गैरजिम्मेवारी स्पष्ट हुने गरेको बताए । ‘भारतीय बजारबाट बोर्डर पार गरेर नेपाली बजारसम्म कसरी मालसमान आयो ?, ती मालसमान रोक्ने जिम्मेवारी कसको हो ? अनि किन रोक्दैन त ?’ उनले थपे, ‘यी विषयहरुमा हामीले नै सरोकारबालामाथि अनुगमन गर्नुपर्ने हो ।’
अध्यक्ष अग्रवालले बोर्डरमा व्यापक रुपमा भइरहेको तस्करीबारे पटक पटक सरोकारबालालाई जानकारी गराउँदा पनि सुनुवाई नभएको बताए । ‘तस्करीबारे मैले आफैं पनि पटक–पटक जानकारी गराएको छु तर सुनुवाई हुँदैन्, आफ्नो जिम्मेवारी पुरा नगर्ने अनि व्यवसायीको मात्रै दोष देखाएर कहाँ हुन्छ ?’
उनले व्यवसायीलाई पनि अवैध मालसमान नराख्न र स्वच्छ रुपमा व्यवसाय गर्न आग्रह गरे । ‘बजार मन्दी रहेका कारण तपाई (व्यवसायी)हरु समस्यामा हुनुहुन्छ, त्यो कुरा नकार्न सकिदैन तर कानूनको परिधिभित्र रहेर व्यवसाय गर्न आग्रह छ’, उनले भने ।
अध्यक्ष अग्रवालले प्रहरी प्रशासनलाई बजारको मन्दीले व्यवसाय धरासायी भइरहेको बेला अनाहकमा व्यवसायीलाई दुःख नदिन पनि आग्रह गरे ।
