लहान-विशेष अदालतले सिराहाको नरहा गाउँपालिकाका तत्कालीन प्रमुख प्रशासकीय अधिकृत र लेखापाललाई भ्रष्टाचार मुद्दामा दोषी ठहर गरेको छ।
तत्कालीन प्रमुख प्रशासकीय अधिकृत भवेशकुमार झा र सुरेश कुसियैतलाई दोषी ठहर गरेको हो ।अदालतका अध्यक्ष टेकनारायण कुँवर तथा सदस्यहरू मुरारीबाबु श्रेष्ठ र रितेन्द्र थापाको इजलासले आइतबार उनीहरूलाई दोषी ठहर गर्दै जनही ६ महिना कैदको फैसला पनि सुनाएको छ ।
यस्तै, उनीहरूले बिगो रकम ६ लाख २० हजार रुपैयाँको दामासाहीले हुन आउने रकम जरिवानासमेत तिर्नुपर्ने आदेशमा उल्लेख छ ।
आर्थिक वर्ष २०७४-७५ मा गाउँ कार्यपालिकाको बैठकबाट निर्णय भई खरिद भएका ५७ प्रकारका औषधिजन्य मालसामानमा अनियमितता भएको भन्दै परेको उजुरीमाथि छानबिन गर्दै अख्तियार दुरुपयोग अनुसन्धान आयोगले उनीहरूमाथि ६ महिनाअघि विशेष अदालतमा मुद्दा दायर गरेको थियो ।
गाउँपालिकाले औषधि खरिदका नाममा २२ लाख ६१ हजार रुपैयाँभन्दा बढी भुक्तानी गरेको थियो । तर, अख्तियारको अनुसन्धानका क्रममा १६ लाख ४१ हजारबराबरको औषधि मात्र वितरण भएको देखिएको थियो ।
