राजविराज, १३ साउन । पूर्वाञ्चल युनिभर्सिटीले आगामी भदौको पहिलो सातादेखि हुने भनिएको परीक्षाहरु स्थगन गरेको छ ।
विश्व विद्यालय परीक्षा व्यवस्थापन कार्यालयबाट प्रकाशित सूचना अनुसार विश्व विद्यालयद्वारा स्थगित गरिएका पूर्व निर्धारित परीक्षाहरु नेपाल सरकारले तोकेको भौतिक दूरी र स्वास्थ्य सम्वन्धी निर्देशिका पालना गर्दै भदौ महिनाको पहिलो सातादेखि सम्वन्धित कलेजहरुमा नै परीक्षा केन्द्र कायम हुने गरी सूचना प्रकाशित गरिएको थियो । पछिल्लो केही दिनमा कोरोना संक्रमणको कारणले कतिपय जिल्लाहरुमा निषेधाज्ञा समेत जारी गरेको हुँदा त्यसलाई मध्यनजर गर्दै अवस्था सामान्य भएपछि मात्र परीक्षाका तालिकाहरु प्रकाशित गरिने परीक्षा नियन्त्रक प्रा. डा. सूर्य प्रसाद संग्रौलाद्वारा हस्ताक्षरित सूचनामा जनाईएको छ ।
