जनकपुरधाम, २८ मंसिर । रौतहटमा एक युवकलाई कटुवा पेस्तोलसहित पक्राउ गरिएको छ । पक्राउ पर्नेमा भारतको सितामडी थाना बरगैनिया मुसहर चोकका २१ वर्षीय नितेस कुमार पटेल रहेका छन् ।
प्रहरी चौकी बेलबिछुवा रौतहटबाट खटिएको प्रहरी टोली र शसस्त्र प्रहरी बल विओपी बेलबिछुवा रौतहटबाट खटिएको प्रहरी टोलीले शनिवार राजदेवी नगरपालिका–८ लक्ष्मीपुरस्थित नेपाल–भारतको दशगज्जाबाट उनलाई पक्राउ गरेको हो ।
चेकजाँच गर्ने क्रममा पटेलले दाहिने तिघ्रामा लुकाएर ल्याएको सो कटुवा पेस्तोल बरामद भएको जिल्ला प्रहरी कार्यालय रौतहटले जनाएको छ । पटेलमाथि थप अनुसन्धान भइरहेको जनाएको छ ।
