काठमाडौं, २० भदौ । रसुवाको भोटेकोशी नदीमा आएको विनाशकारी बाढीले ठूलो मानवीय क्षति पुर्याएको छ। बाढीमा परी मृत्यु हुनेको संख्या १ हजार ३४४ पुगेको छ भने हजारौं मानिस अझै सम्पर्कविहीन छन्।
नेपाल प्रहरीले शनिबार बिहान सार्वजनिक गरेको खोज तथा उद्धारसम्बन्धी पछिल्लो विवरणअनुसार बिहान ५ बजेसम्म १ हजार ३४४ शव फेला परिसकेका छन्।
फेला परेका शवमध्ये ५२ बालक, ३३ बालिका, २६९ महिला र ४८९ पुरुष छन्। बाढीको वेग र विनाशको भयावहता झल्काउने गरी ५०१ वटा आंशिक अंगसमेत फेला परेको प्रहरीले जनाएको छ।
बाढीपछि अझै ४ हजार ८९८ जना सम्पर्कविहीन रहेको प्रहरीको तथ्यांक छ। बेपत्ताको संख्या ठूलो रहेकाले मृतकको संख्या अझ बढ्न सक्ने जोखिम देखिएको छ।
उद्धार कार्य भने निरन्तर जारी छ। सुरक्षाकर्मीले हालसम्म ८ हजार ६३१ जना बाढी प्रभावितको उद्धार गरिसकेका छन्।
बाढीको चपेटामा सुरक्षाकर्मीसमेत परेका छन्। प्रहरीका २५ जना कर्मचारी अझै सम्पर्कविहीन छन् भने ६५ जना प्रहरी कर्मचारी बाढीबाट प्रभावित भएको प्रहरीले जनाएको छ।
खोजी, उद्धार तथा राहत कार्यलाई तीव्रता दिन सुरक्षा निकायका ७ हजार ९१२ जना जनशक्ति परिचालन गरिएको छ।
Image: Bigyan Rai/facebook
