जनकपुरधाम । आर्थिक मामिला तथा योजना मन्त्री विजय कुमार यादवले कोभिड नियन्त्रण, रोकथाम तथा उपचारका लागि प्रदेश सरकारले २० करोड बजेट छुट्याएको जानकारी दिएका छन् ।
यादवले आर्थिक वर्ष २०७८/७९ को बजेट सार्वजनिक गर्दै यस्तो बताएका हुन् । उनले कोरोनाको रोकथाम, औषधी र खोपका लागि बजेट अभाव नहुने पनि बताए । सबै अस्पतालमा उपचारको व्यवस्था गरिने उल्लेख गर्दै यादवले अक्सिजन प्लान्ट र सिलिन्डर खरिदलाई बजेट व्यवस्था गरेको जानकारी दिए ।
प्रदेशका अस्पतालहरूमा मृगौला बिरामीहरूको बढ्दो चापलाई दृष्टिगत गर्दै ३५ वटा डायलासिस मेसिन खरिद गर्नका लागि १२ करोड विनियोजन गरिएको बताएका छन्।
