महोत्तरी । महोत्तरीको मटिहानी नगरपालिका–८ बाट स्रोत नखुलेको झण्डै ४० लाख रुपैयाँसहित एक जना पक्राउ परेका छन् । पक्राउ पर्नेमा धनुषाको मुखियापट्टी मुसहरनिया गाउँपालिका–१ मुसहरनियाका ३८ वर्षीय संजय साह भनिने संजय कुमार साह छन् ।
दशगज्जा क्षेत्रमा भारतबाट नेपालतर्फ अनटेष्ट स्कुटर चढेर आइरहेका साहलाई रोकेर चकेजाँच गर्दा स्कुटरको सिटमुनिबाट ३९ लाख ८० हजार रुपैयाँ फेला परेको प्रदेश नम्बर २ प्रदेश प्रहरी कार्यालयले जनाएको छ ।
जिल्ला प्रहरी कार्यालय महोत्तरी र प्रहरी चौकी मटिहानीबाट खटिएको प्रहरी टोलीले उनलाई हिजो (मंगलबार) विहान पक्राउ गरेको छ । सो रकम आवश्यक कारबाहीको लागि जलेश्वर भन्सार कार्यालयको पठाइएको प्रहरीले जनाएको छ ।
