राजविराज, २१ असोज । नेकपा एमाले र जनता समाजवादी पार्टी (जसपा) बीच आंशिक चुनावी तालमेलको सहमति भएको छ ।
सहमतिअनुसार जसपाले प्रतिनिधि सभातर्फ १७ सिट र प्रदेश सभातर्फ ४२ सिट पाउने छ । प्रदेश २ का ३२ प्रतिनिधि सभा निर्वाचन क्षेत्रमध्ये एमाले र जसपाले १४/१४ स्थानमा तालमेलको सहमति भएको एमाले महासचिव शंकर पोखरेलले बताएका छन् ।
त्यस्तै, रुपन्देही, कैलाली, मोरङ र सुनसरी गरी जसपाले थप ४ सिटमा एमालेको साथ पाउने छ । समग्रमा उसले प्रतिनिधि सभातर्फ १७ स्थानमा एमालेसँग तालमेल गरेको छ । एमालेले भने प्रदेश २ का जिल्लाबाहेक नवलपरासी पश्चिम, रुपन्देही, कैलाली, मोरङ र सुनसरीमा पनि जसपाको साथ पाउने छ। प्रदेश २ का १४ र बाँकी जिल्लाका २१ स्थानमा जसपासँग तालमेल गरेको छ ।
तालमेल बाहेकका निर्वाचन क्षेत्रहरुमा दुवै पार्टीले उम्मेदवारी दिनसक्ने सहमति भएको छ भने दुवै पार्टीको सहकार्य निर्वाचन पछि पनि निरन्तर रहने सहमति भएको जनाएको छ।
