राजविराज — सिरहाको लहान नगरपालिकाबाट ४ लाख ३५ हजार नेपाली नक्कली रुपैयाँसहित दुई जनालाई पक्राउ गरिएको छ । पक्राउ पर्नेमा सिरहाको लहान नगरपालिका–१९ का ३० वर्षीय मोहम्मद ओसिन र लहान–१० का २२ वर्षीय मोहम्मद राज शेख छन् ।
उनीहरुलाई सशस्त्र प्रहरी बलको इन्टेलिजेन्स ब्युरोले शनिवार साँझ लहान–८ स्थित पशुपति माध्यमिक विद्यालयनजिकको रोडबाट पक्राउ गरेको हो । उनीहरुको साथबाट ४ सय ३५ थान १ हजार दरका नक्कली नोट, नोट बनाउन प्रयोग गरिने कागजको बण्डल, २ थान मोबाइल सेट, ७ थान सिमकार्ड तथा १ हजार ५५ रुपैयाँसमेत बरामद भएको छ ।
उनीहरुलाई बरामद सामानसहित कारबाहीको लागि ईलाका प्रहरी कार्यालय लहानमा बुझाइएको छ ।
