विराटनगर । विराटनगर महानगरपालिकाको मेयर पदमा उमेश यादवले आइतवार मनोनयन पत्र दर्ता गराएका छन् । शनिवार जनता समाजवादी पार्टी (जसपा)को साधारण सदस्यसमेत नरहने गरी पार्टी परित्याग गरेका नेता यादवले स्वतन्त्र मनोनयन पत्र दर्ता गराएका हुन् ।
पार्टी तालमेलको पक्षमा गएको र आफूलाई त्यो स्वीकार नभएको जनाउँदै यादवले आफूले स्वतन्त्र उमेदवारी दिएको बताए । यादवको प्रस्तावकमा जगननाथ मण्डल र समर्थकमा सरोज यादव छन् ।
यादव जसपाको संघीय परिषद् सदस्य थिए । अघिल्लो स्थानीय तहको निर्वाचनमा यादव विराटनगरको मेयरमा उठेका थिए । उनले नेपाली कांग्रेस, नेकपा (एमाले)का उमेदवारपछि बढी मत ल्याएका थिए ।
