जनकपुरधाम । प्रदेश २ सरकारको बजेट आज आउँदैछ । बजेटको आकार गत बर्ष भन्दा सानो हुने भएको छ । प्रदेशका अर्थमन्त्री विजयकुमार यादवका अनुसार आगामी आर्थिक वर्ष २०७८/०७९का लागि ल्याउने बजेटको आकार तुलनात्मक रुपमा सानो हुनेछ । संघीय सरकारले पनि चालु आर्थिक वर्षका लागि भन्दा कम बजेट पाठाएको उनले बताए ।
संघीय सरकारले समान्यकरण अनुदान बापत ७ अर्ब ३९ करोड ३४ लाख, राजश्वअन्तर्गत ९ अर्ब ९८ करोड २३ लाख, सशर्त अनुदान ५ अर्ब ९७ करोड ५२ लाख, विशेष अनुदान ५८ करोड ७९ लाख र समपूरक बजेट ३४ करोड ६९ लाख गरी कुल २४ अर्ब ६८ करोड ५७ लाख बजेट प्रदेशमा पठाएको छ ।
संघीय सरकारले बिनियोजन गरेको बजेटमा प्रदेशको आन्तरिक अनुमानित रकम, आर्थिक वर्षको बजेटमा खर्च हुन नसक्ने रकम र आन्तरिक ऋण समावेश गरी आर्थिक वर्ष २०७८/०७९ का लागि बजेट ल्याउने आर्थिक मामिला तथा योजना मन्त्रालयले जनाएको छ ।
प्रदेश सरकारले गत आर्थिक वर्ष २०७६/०७७ मा ३८ अर्व ७२ करोड ५६ लाख बजेट ल्याएको थियो । चालु आर्थिक वर्षमा ५ अर्ब घटाएर ३३ अर्व ५६ करोड ९ लाख बजेट ल्याएको थियो ।
सरकारले ल्याएको नीति तथा कार्यक्रम आइतबार प्रदेशसभामा बहुमतले पारित भएपछि बजेट ल्याउने बाटो खुलेको हो ।
