राजिवराज । फिलिपिन्स फेरि एकपटक भीषण प्राकृतिक विपत्तिको चपेटामा परेको छ। नोभेम्बरको सुरुवाती हप्तामा आएको टाइफुन ‘कलमेगी’ले देशका धेरै भाग उजाड बनाइदिँदा कम्तीमा १४० जनाको ज्यान गएको छ र १२७ जना अझै बेपत्ता रहेकाे समाचार एजेन्सीहरुले जनाएकाे छ ।
बाढी र पहिरोले गाउँदेखि सहरसम्म विनाश मच्चाएको छ। इएम–डाट विपद् डेटाबेसले ‘कलमेगी’लाई सन् २०२५ को सबैभन्दा घातक टाइफुनका रूपमा उल्लेख गरेको छ। गत वर्षको ‘ट्रामी’ भन्दा पनि यसले बढी तबाही मच्चाएको छ।
सेबु प्रान्त विशेष गरी सबैभन्दा बढी प्रभावित भएको क्षेत्र हो। नदी किनारका घरहरू, सवारीसाधन र ठूला कन्टेनरहरू बाढीले बगाइदिएको छ। सहरका सडकहरू नदीझैं बनेका छन् र स्थानीय जीवन पूर्णरूपमा ठप्प छ। राष्ट्रपति फर्डिनान्ड मार्कोस जुनियरले आपतकालीन राहतका लागि राष्ट्रिय कोष खोल्दै आवश्यक सामग्रीमा मूल्य नियन्त्रण गर्न निर्देशन दिएका छन्। सरकार अहिले उद्धार र पुनःस्थापनामा केन्द्रित छ।
मौसम विज्ञ बेनिसन एस्टारेजाका अनुसार, “सेबुमा यो नोभेम्बर महिनामा सामान्य भन्दा डेढ गुणा बढी वर्षा भएको छ, जुन २० वर्षमा एकपटक मात्र देखिने असामान्य अवस्था हो।” उनले भने, तीव्र सहरीकरणले बाढीको असर अझै गम्भीर बनाएको छ।
जलवायु वैज्ञानिकहरू चेतावनी दिन्छन्—मानवसिर्जित जलवायु परिवर्तनकै कारण यस्ता टाइफुनहरू क्रमशः बलिया र विनाशकारी हुँदै गइरहेका छन्। सरकारले सम्पूर्ण देशमा सतर्कता घोषणा गरेको छ र सेना, प्रहरी तथा राहतकर्मीहरूलाई प्रभावित क्षेत्रमा पठाइएको छ। अहिले पनि बाढीग्रस्त क्षेत्रमा उद्धार र राहत कार्य निरन्तर चलिरहेको छ।
