राजविराज, १२ फागुन–सप्तरीमा आइतबार मध्यरातमा हावाहुरीसँगै परेको असिना–पानीले किसानलाई ठुलो क्षति ब्यहोर्नु परेको छ ।
राति १२ बजेदेखि २ बजेसम्म निरन्तर हावाहुरीसँगै असिना–पानी परेर जिल्लाको हनुमाननगर कंकालिनी नगरपालिका–१ भारदह क्षेत्रमा किसानको नगदे बालीमा ठुलो क्षति पुगेको हो ।
भारदहका झण्डै २ सय ५० बढी किसानले गहुँ, मकै, तोरी, केरा, लसुन, प्याजसहित लगाएको तरकारी खेतीमा समेत क्षति पुगेको हो ।
स्थानीय युवा किसान श्यामकुमार राउतले गराएको जानकारी अनुसार १–१ सय विघामा लगाएको गहुँ र मकै बालीमा असिना–पानीले बर्बाद गरेको छ भने २५ विघामा लगाएको केरामा समेत क्षति पुगेको छ ।
हनुमाननगर कंकालिनी नगरपालिकाका नगर प्रमुख विरेन्द्र माझीले हावाहुरी असिनाले किसानलाई क्षति पुगेको जानकारी गराउँदै क्षतिको विवरण संकलन काम अगाडि बढाएको जानकारी दिए ।
उनका अनुसार यसअघि असोजमा कोसी नदीमा आएको बाढीले क्षति पुग्दा यसक्षेत्रका किसानलाई ठुलो आर्थिक क्षति ब्यहोर्नु परेको थियो ।
स्थानीय सरकारसँग किसानलाई क्षतिपूर्ति उपलब्ध गराउने बजेट नरहेकाले आवश्यक ब्यवस्था गरिदिन मधेश प्रदेश सरकार र संघ सरकारसँग नगरप्रमुख माझीले आग्रह गरे ।
तस्बिर सौजन्यः श्यामकुमार राउत/भारदह
