जनकपुरधाम, १२ माघ । मधेश प्रदेशको जनसंख्या १ दशमलव २५ प्रतिशतले वृद्धि भएर नेपालको सबैभन्दा धेरै जनसंख्या हुने प्रदेश भएको छ ।
केन्द्रीय तथ्यांक विभागले बुधवार सार्वजनिक गरेको राष्ट्रिय जनगणना–२०७८ को प्रारम्भिक नतिजाअनुसार मधेश प्रदेशको जनसंख्या ६१ लाख २६ हजार २८८ पुगेको छ । यसअघिको २०६८ को जनगणनाअनुसार यस प्रदेशमा ५४ लाख ४ हजार १४५ जनसंख्या थियो ।
जसमा ७ लाख २२ हजार १४३ अर्थात १ दशमलव २५ प्रतिशतले वृद्धि भएको छ ।
त्यस्तै सबैभन्दा कम जनसंख्या हुनेमा कर्णाली प्रदेश परेको छ । कर्णाली प्रदेशको जनसंख्या १६ लाख ९४ हजार ८ सय ८९ रहेको विभागले जनाएको हो ।
यसअघिको जनगणनामा कर्णालीको जनसंख्या १५ लाख ७० हजार ४ सय १८ थियो । यसैगरी कर्णालीको जनसंख्या वृद्धिदर ० दशमलव ७६ रहेको तथ्यांक विभागले उल्लेख गरेको छ ।
