रौतहट, १४ भदौ । रौतहटमा गरुडा नगरपालिका–३ मलाही टोलमा मंगलबार विहान चट्याङ लागेर तीन जना महिलाको मुत्यु भएको छ भने एक जना घाइते समेत भएका छन् ।
स्थानीय सुदनीयादेवी सहनी, उनकी १७ वर्षीया छोरी जगियाकुमारी र स्थानीय रूप नारायणकी १८ वर्षीया छोरी मनिषा सहनीको चट्याङ लागेर मृत्यु भएको जिल्ला प्रहरी कार्यालयका प्रहरी नायव उपरीक्षक सुनिल मल्लले जानकारी दिए ।
उनका अनुसार चट्याङ लागेर गम्भीर घाइते भएका उनीहरूको गरूडास्थित अस्पतालमा उपचारको क्रममा मृत्यु भएको हो ।
त्यस्तै, चट्याङ लागेर सोही ठाउँका ४० वर्षीया सहेलीदेवी सहनी घाइते भएकी छिन् । उनको सिटी अस्पतालमा उपचार भइरहेको प्रहरी नायव उपरीक्षक मल्लले बताए ।
