राजविराज, २५ असार । सप्तरीका अस्पताल र सरकारी कार्यालयमा गरिएको छड्के अनुगमनबाट ९८ जना चिकित्सक, स्वास्थ्यकर्मी तथा कर्मचारीहरु अनुपस्थित रहेको पाइएको छ ।
अस्पताल तथा सरकारी कार्यालयहरुमा सेवा प्रवाहमा ढिलासुस्ती भइरहेको गुनासो हुन थालेपछि सोमबार प्रमुख जिल्ला अधिकारी (सिडिओ) भूपेन्द्र थापाले छड्के अनुगमन गरेका थिए ।
अनुगमनको क्रममा गजेन्द्रनारायण सिंह अस्पतालमा १३ जना चिकित्सकसहित ८९ जना स्वास्थ्यकर्मी तथा कर्मचारीहरु अनुपस्थित रहेको पाइएको सिडिओ थापाले बताए । ‘अस्पताल जस्तो संवेदनशील कार्यालयमा पनि ठुलो संख्यामा चिकित्सक, स्वास्थ्यकर्मी र कर्मचारीहरु अनुपस्थित रहनु दुःखद् विषय हो’ उनले भने, ‘यस्तो परिपार्टी सुधार नभए अब उपरान्त त्यस्ता चिकित्सक, स्वास्थ्यकर्मी र कर्मचारीलाई कारबाही हुन्छ ।’
त्यस्तै, घरेलु तथा साना उद्योग कार्यालयमा कार्यालय प्रमुख रेखाकुमारी यादव, सूचना अधिकारी कमलनारायण साहसहित ८ जना कर्मचारी अनुपस्थित रहेको पाइएको छ ।
अनुगमनको क्रममा कार्यालय प्रमुख यादव उपस्थित भए तापनि असार २२ गतेदेखि नै उनले हाजिर नगरेको पाइएको सिडिओ थापाले जानकारी दिए । त्यस्तै, सूचना अधिकारी साहले पनि असार ४ गतेपछि हाजिर गरेका छैन् ।
त्यस्तै, साल्ट ट्रेडिङ्ग कर्पोरेशन लिमिटेडमा एक जना कर्मचारी अनुपस्थित रहेको पाइएको उनले बताए । ‘अनुपस्थित देखिएका चिकित्सक, स्वास्थ्यकर्मी तथा कर्मचारीहरुसँग पहिलो चरणमा स्पष्टिकरण माग गर्ने र चित्त बुझ्दो स्पष्टिकरण नआएको खण्डमा सम्बन्धित कार्यालयमा कारबाहीको लागि सिफारिस गरिनेछ’, सिडिओ थापाले भने ।
अनुगमनकै क्रममा सिडिओ थापाले चिकित्सक, स्वास्थ्यकर्मी तथा कर्मचारीहरुलाई नियमित रुपमा कार्यालय समयमा उपस्थिति गराई छिटो–छरितो र प्रभावकारी सेवा प्रवाहतर्फ ध्यान पुर्याउन कार्यालय प्रमुखहरुलाई निर्देशन समेत दिए ।
