जनकपुरधाम–जनमत पार्टीले मधेश प्रदेशको मुख्यमन्त्रीमा सतिशकुमार सिंहलाई पठाउने निर्णय गरेको छ ।
पार्टीको केन्द्रीय सचिवालयको बैठकले सिंहलाई मुख्यमन्त्रीमा पठाउने निर्णय भएको पार्टीका सचिव बिपी साह जानकारी दिए ।
उनका अनुसार जनमतको नेतृत्वमा सरकार बनाउन नेकपा (एमाले), नेकपा (माओवादी केन्द्र), नेकपा (एकीकृत समाजवादी), नागरिक उन्मुक्ति पार्टी, नेपाल सङ्घीय समाजवादीको सहमति रहेको छ ।
कुल १०७ जना सदस्य रहेका प्रदेश सभामा बहुमतका लागि ५४ जनाको समर्थन आवश्यक पर्छ । यस गठबन्धनलाई ५५ सदस्यको समर्थनमा मुख्यमन्त्रीमा दाबी पेस गर्ने तयारी रहेको सचिव साहले बताए ।
सप्तरी– २ (क) बाट निर्वाचित सिंहलाई मुख्यमन्त्री बनाउन गठबन्धन दलहरूले बहुमतसहित बिहीबार नै प्रदेश प्रमुखलाई दाबी पेस गर्ने तयारी भइरहेको जनाएको छ ।
मुख्यमन्त्रीमा पठाउन लागिएका प्रदेश सांसद सिंह सप्तरीको तिलाठी कोइलाडी गाउँपालिकाका अध्यक्ष समेत रहिसकेका छन् ।
