राजविराज । विगत केही दिन यताको अबिरल वर्षाका कारण सप्तरीको राजविराज नगरपालिकाको विभिन्न वडाका दुई सय तीस घर डुबानमा परेको छ ।
नगरपालिकाका मेयर शम्भु प्रसाद यादवले दिएको जानकारी अनुसार वडा नम्वर ५ मा एक सय, वडा नम्वर ६ मा एक सय र वडा नम्वर १२ मा ३० समेत २ सय ३० घर डुबानमा परेको छ । निरन्तरको वर्षाको पानी बस्तीहरुमा पसेका कारण दैनिकी प्रभावित भएको छ । आइतवारदेखि बाढीको पानी घरमा दुई तीन फिटसम्म पानी जमेको छ । उक्त घरहरुमा चुलो समेत बाल्नसक्ने अवस्था नरहेको स्थानीयले जानकारी दिएका छन् ।
हुलाकी सडक सहित अन्य बाटोहरुमा चार फिटसम्म पानी रहेकोले आवागमनमा समेत समस्या भएको छ । यातायातका साधनहरु समेत चल्न सकेको छैन ।
यता नगरपालिकाका मेयर यादवले वर्षा र बाढीले वर्सेनी नगरको विभिन्न वस्तीहरुमा दुःख दिने गरेकोले यसको स्थायी समाधानकालागि आफु प्रयासरत रहेको बताए । नदी अतिक्रमण भएकोले पानी सहज रुपमा बग्न नसकेपछि ओभरफ्लो भएर वस्तीहरुमा पस्ने गरेको उनका भनाई छ ।
