महादेवा गाउँपालिकाः औषधि खरिदमा चरम लापरवाही

राजविराज । व्यक्तिको जीवनसँग प्रत्यक्ष सरोकार राख्ने वस्तु हो औषधि । बिरामी व्यक्तिलाई निको पार्न औषधि प्रयोग गर्न दिइन्छ । तर, औषधी खरिदमा पनि सप्तरीको महादेवा गाउँपालिकाले लापरवाही गरेको पाइएको छ ।

महालेखा परीक्षकको कार्यालयले सार्वजनिक गरेको तथ्यांक अनुसार गाउँपालिकाले झन्डै ३० लाख रुपैयाँ बराबरको औषधी खरिदमा लापरवाही गरेको पाइएको हो । सार्वजनिक खरिद नियमावली २०६४ को नियम ८५ को उपनियम १(क)अनुसार २० लाख रुपैयाँसम्मको औधषीजन्य मालसमान उत्पादकले राष्ट्रियस्तरको समाचार पत्रमा सूचना प्रकाशन गरी तोकेको विक्री मूल्यमा खरिद गर्नुपर्ने व्यवस्था छ । तर, गाउँपालिकाले भने सो प्रक्रिया विना नै आर्थिक वर्ष ०७६/०७७ मा २९ लाख ९८ हजार ७ सय ८८ मूल्य बराबरको औषधी खरिद गरेको प्रतिवेदनमा उल्लेख छ ।

आपूर्ति हुने औषधि डब्लूएचओ सटिफाइड हुनुपर्ने औषधिको उत्पादन, मिति, व्याच नम्बर र म्याद समाप्त मिति उल्लेख गरी सम्बन्धित बिषय विज्ञबाट मुचुल्का उठाई राख्नुपर्नेमा त्यस्तो केहि पनि राखेको पाइएको छैन् । खरीद गरिएको औषधि बिक्रीको लागि होइन भनी खुलाएको पनि नपाइएको प्रतिवेदनमा भनिएको छ ।

त्यसबाहेक आपूर्ति भएका औषधि एवं सर्जिकल सामान स्टोर दाखिला हुनुअघि स्पेसिफिकेशन अनुसार भए/नभएको नखुलाएको कारण औषधिको गुणस्तर र म्याद सम्बन्धमा यकिन गर्न नसकिएको महालेखाले जनाएको छ ।

उता, गाउँपालिका प्रमुख प्रशासकीय अधिकृत रामलखन यादवले त्यसो न भएको प्रतिक्रिया दिए । ‘यद्यपी के रैछ बुझ्छु’, उनले भने ।

Author:

क्याटोगरी छान्‍नुहोस