जनकपुर, १२ मंसिर । सर्लाहीको बरहथवा नगरपालिकामा एक महिला आफ्ना दुई सन्तानसहित आइतवार विहान मृत अवस्थामा फेला परेकी छिन् । वडा १ की २६ वर्षीया कविता हजारी आफ्नै घरभित्र मृत अवस्थामा फेला परेकी हुन् ।
कविता घरभित्रै झुण्डिएको अवस्थामा मृत फेला परेकी जिल्ला प्रहरी कार्यालय सर्लाहीका प्रवक्ता डीएसपी माधवप्रसाद बुढाथोकीले जानकारी दिए । कविताको ४ वर्षीय छोरा र ६ वर्षीया छोरी आमा झुण्डिए नजिकै तल भुइँमा मृत फेला परेको उनले बताए ।
तीनै जनाको शव पोष्टमार्टमका लागि पठाइएको छ भने घटनाबारे थप अनुसन्धान भइरहेको जनाएको छ । मृतक कविताका श्रीमान् विगत ४ बर्षदेखि वैदेशिक रोजगारमा छन् ।
