जनकपुरधाम, १९ फागुन । कर्मचारी अभावका कारण मधेश प्रदेश सरकारले गठन गरेको आयोगहरुमा कामकाज प्रभावित हुँदै आएको छ ।
सरकारले जनलोकपाल आयोग, प्रदेश लोकसेवा आयोग, आम सञ्चार प्राधिकरण, मिडिया काउन्सिल, चलचित्र तथा लोकसञ्चार प्रवर्द्धन बोर्ड र दलित विकास समिति गठन गरेको छ। तर, तीमध्ये कुनै पनि आयोगमा दरबन्दीअनुसारको कर्मचारी छैन् ।
कर्मचारी नहुँदा आयोगहरुले अपेक्षाअनुकुल काम गर्न सकेको छैन् भने सरकारले नियुक्त गरेका पदाधिकारीहरु पनि आजित भएका छन् ।
यसैबीच, आम सञ्चार प्राधिकरणका अध्यक्ष श्यामसुन्दर यादवले मधेश प्रदेशमा कर्मचारी पाउन अत्यन्तै गाह्रो भइरहेको समस्या पोखेका छन् । उनले विहिवार सामाजिक सञ्जालमार्फत आफ्नो समस्या पोखेका हुन् ।
उनले लेखेका छन्, ‘मधेश प्रदेशमा बरू देउता पाउन सहज छ तर कर्मचारी पाउन अत्यन्तै गाह्रो ।’
