काठमाडौं । स्थानीय तहका प्रमुख प्रशासकीय अधिकृतहरुलाई अबदेखि स्वीकृित बेगर बिदा बस्न नपाउने भएको छ ।
जिल्ला समन्वय समितिका अधिकारी र स्थानीय तहका प्रमुख प्रशासकीय अधिकृतले बिदामा बस्दा संघीय मामिला तथा सामान्य प्रशासन मन्त्रालयबाट अनिवार्य रुपमा स्वीकृति गराउनुपर्ने भएको हो ।
जानकारीविना कार्यक्षेत्र छाडेर जाँदा सेवा प्रवाहमा समस्या देखिएकाले अबदेखि मन्त्रालयको स्वीकृित बेगर बिदा पनि बस्न नपाइने संघीय मामिला तथा सामान्य प्रशासन मन्त्रालयको संघीय तथा प्रादेशिक कर्मचारी प्रशासन शाखाका प्रमुख रवीन्द्रजङ्ग थापाले जानकारी दिए ।
ती अधिकारीहरुलाई जानकारीविना कार्यालय छाडेर नजान समेत निर्देशन दिइएको छ । मन्त्रालयले ७७ जिल्ला समन्वय समिति र सात सय ५३ वटै स्थानीय तहलाई पत्र पठाइ अब उप्रान्त मन्त्रालयको पूर्वस्वीकृति विना जिल्ला र कार्यक्षेत्र नछाड्न पनि निर्देशनमा उल्लेख गरेको छ ।
