डा. सुष्मा साउद
तराईमा बस्नुहुन्छ भने यतिबेला तपाईंहरू असह्य गर्मीको सामना गरिरहनुभएको हुन सक्छ।
आयुर्वेदअनुसार गर्मी मौसममा शरीरमा पित्त दोष बढ्ने भएकाले शरीरलाई शीतल राख्ने आहार, विहार र व्यवहार अपनाउन आवश्यक हुन्छ।
“हितभुक्, मितभुक्, ऋतुभुक् च निरामयः।”
अर्थात्, हितकर, सन्तुलित तथा ऋतुअनुसारको भोजन गर्ने व्यक्ति निरोगी रहन्छ। त्यसैले गर्मीमा खानपान र जीवनशैलीमा विशेष ध्यान दिनुपर्छ।
गर्मीमा के गर्ने?
• प्रशस्त मात्रामा पानी पिउने।
• नरिवल पानी, सर्बत, बेल, काक्रो, तरबुजा, खरबुजाजस्ता शीतल प्रकृतिका खाद्य पदार्थ सेवन गर्ने।
• दिउँसोको चर्को घामबाट जोगिने।
• हल्का तथा सजिलै पच्ने भोजन गर्ने।
• पर्याप्त निद्रा र आराम गर्ने।
यी कुरामा विशेष ध्यान दिनुहोस् :
• अत्यधिक पिरो, अमिलो तथा तारेका परिकारको सेवन नगर्ने।
• मदिरा सेवन तथा धूम्रपानबाट टाढा रहने।
• लामो समयसम्म घाममा बस्ने बानी त्याग्ने।
• पर्याप्त पानी नपिई बाहिर काम नगर्ने।
यी बानीहरूले स्वास्थ्यमा नकारात्मक असर पार्न सक्छन्। त्यसैले दुई–तीन महिनासम्म रहने गर्मी मौसमलाई सहज रूपमा पार गर्न औषधिभन्दा पहिले आफ्नो जीवनशैली र खानपानलाई मौसमअनुकूल बनाउनुहोस्। शरीरलाई शीतल राख्न सकियो भने धेरै मौसमी समस्याबाट बच्न सकिन्छ।
