ठगीको आरोपमा सेफ सन्तोष साह पक्राउ

जनकपुरधाम । मिथिला खानाको परिकारका लागि चर्चित सेफ सन्तोष साहलाई प्रहरीले ठगीसम्बन्धी आरोपमा पक्राउ गरेको छ।
काठमाडौं उपत्यका अपराध अनुसन्धान कार्यालयबाट खटिएको टोलीले शुक्रबार धनुषाको जनकपुरधाम उपमहानगरपालिका–८ स्थित रामानन्द चोकबाट उनलाई पक्राउ गरेको हो। कार्यालयका प्रमुख एसएसपी सन्तोष खड्काका अनुसार सिराहाको कर्जन्हा नगरपालिका–११ निवासी साहविरुद्ध सकुन्तला थापा नामकी महिलाले ठगीको आरोप लगाउँदै जाहेरी दर्ता गराएकी थिइन्। सोही जाहेरीका आधारमा काठमाडौं जिल्ला अदालतबाट पक्राउ अनुमति लिएपछि प्रहरीले उनलाई नियन्त्रणमा लिएको जनाएको छ।

प्रहरीले सन्तोष साहसँगै सिराहाकै कर्जन्हा नगरपालिका–९ निवासी नारायण साह सुडीलाई पनि पक्राउ गरेको छ। दुवै जनामाथि ठगीसम्बन्धी घटनामा संलग्न रहेको आशंकामा अनुसन्धान अघि बढाइएको प्रहरीले जनाएको छ।
पक्राउ परेका दुवैलाई आवश्यक अनुसन्धानका लागि काठमाडौं ल्याउने तयारी भइरहेको छ। उनीहरूविरुद्ध परेको उजुरी तथा उपलब्ध प्रमाणका आधारमा थप अनुसन्धान प्रक्रिया अगाडि बढाइने काठमाडौं उपत्यका अपराध अनुसन्धान कार्यालयले जनाएको छ।
सन्तोष साह नेपाली मूलका चर्चित सेफ हुन्। विभिन्न अन्तर्राष्ट्रिय पाककला प्रतियोगितामा सहभागिता जनाउँदै उनले लोकप्रियता हासिल गरेका छन्। उनको पक्राउको खबर सार्वजनिक भएसँगै सामाजिक सञ्जालमा विभिन्न प्रतिक्रिया आइरहेका छन्।
यद्यपि, प्रहरीले हाल प्रारम्भिक अनुसन्धान जारी रहेकाले घटनाको विस्तृत विवरण अनुसन्धानपछि मात्रै खुल्ने जनाएको छ। अदालतबाट दोषी प्रमाणित नभएसम्म कानुनी रूपमा उनी निर्दोष मानिने व्यवस्था रहेको छ।